vo iztirāb shab-e-intizār hotā hai

ki māhtāb kaleje ke paar hotā hai

fasurda aap na hoñ dekh kar mirā dāmāñ

ye bad-nasīb yūñhī taar taar hotā hai

nahīñ kuchh aur mohabbat kī choT hai hamdam

ye dard dil meñ kahīñ baar baar hotā hai

tirī talāsh se ġhāfil nahīñ tirā vahshī

zavāl-e-hosh meñ bhī hoshiyār hotā hai

ho un kā vāda-e-fardā ġhalat sahī lekin

maiñ kyā karūñ ki mujhe e.atibār hotā hai