kaise kaise manzar merī āñkhoñ meñ aa jaate haiñ
yādoñ ke sab ḳhanjar merī āñkhoñ meñ aa jaate haiñ
merī pyāsī āñkheñ phir bhī rah jaatī haiñ pyāsī haiñ
yuuñ to sāt-samundar merī āñkhoñ meñ aa jaate haiñ
kis kī yaad kā dariyā mere dil se ho kar bahtā hai
kis ke dard pighal kar merī āñkhoñ meñ aa jaate haiñ
kis kī yaad kī ḳhushbū se maiñ din-bhar mahkā rahtā huuñ
kis ke ḳhvāb sañvar kar merī āñkhoñ meñ aa jaate haiñ
jab bhī sochne lagtā huuñ maiñ tere mere baare meñ
aaTā daliyā daftar merī āñkhoñ meñ aa jaate haiñ