Azeem Murtaza

lai na saba bu-e-chaman ab ke baras bhi

Azeem Murtaza

Lahore, Punjab, Pakistan

1923-1983

laa.ī na sabā bu-e-chaman ab ke baras bhī

kuchh soch ke ḳhāmosh haiñ yārān-e-qafas bhī

dastūr-e-mohabbat nahīñ jaañ se guzarnā

kar lete haiñ ye kaam kabhī ahl-e-havas bhī

nāzuk haiñ marāhil safar-e-manzil-e-ġham ke

is raah meñ kho jaatī hai āvāz-e-jaras bhī

āzād bhī ho jā.eñge āḳhir tire qaidī

ik roz bikhar jā.egī zanjīr-e-nafas bhī

añgusht-numā shaiḳh-o-barahman ke chalan par

masjid ke manāre bhī haiñ mandir ke kalas bhī

dīvāna abhī tak hai usī dushman-e-jāñ

aatā hai dil-e-zār pe ġhussa bhī taras bhī

kuchh aap ġham kuchh ġham-e-jāñ kuchh ġham-e-duniyā

dāman meñ mire phuul bhī haiñ ḳhaar bhī ḳhas bhī

chup rah ke bhī mumkin na rahā dard chhupānā

ik sho.ala-e-āvāz hai ab mauj-e-nafas bhī

Top Urdushayar.com