bahār aa.ī hai sadme se hamārā haal abtar hai
ghaTā ghanghor chhā.ī hai na saaqī hai na sāġhar hai
nishāñ kyā pūchhte haiñ aap ham ḳhāna-ba-doshoñ kā
kabhī gulshan meñ maskan hai kabhī sahrā meñ bistar hai
haqārat kī nigāhoñ se na farsh-e-ḳhāk ko dekho
amīroñ kā faqīroñ kā yahī āḳhir ko bistar hai
'haqīr' ik ḳhvāb thā jo aap ne dekhā thā london meñ
na vo sāmān hai baaqī na ab pahlū meñ dilbar hai