safar hai mirā apne Dar kī taraf

mirī ek zāt-e-digar kī taraf

bhare shahr meñ ik bayābāñ bhī thā

ishāra thā apne hī ghar kī taraf

mire vāste jaane kyā lā.egī

ga.ī hai havā ik khañDar kī taraf

kināra hī kaTne kī sab der thī

phisalte ga.e ham bhañvar kī taraf

koī darmiyāñ se nikaltā gayā

na dekhā kisī ham-safar kī taraf

tirī dushmanī ḳhud hī maa.il rahī

kisī rishta-e-be-zarar kī taraf

rahī dil meñ hasrat ki 'bānī' chaleñ

kisī manzil-e-pur-ḳhatar kī taraf