sad-sauġhāt sakūñ firdaus september aa
ai rañgoñ ke mausam manzar manzar aa
ādhe-adhūre lams na mere haath pe rakh
kabhī supurd-e-badan sā mujhe mayassar aa
kab talak phailā.egā dhund mire ḳhuuñ meñ
jhūTī sachchī navā meñ Dhal kar lab par aa
mujhe pata thā ik din lauT ke aa.egā tū
rukā huā dahlīz pe kyuuñ hai andar aa
ai paiham-parvāz parinde dam le le
nahīñ utartā āñgan meñ to chhat par aa
us ne ajab kuchh pyaar se ab ke likkhā 'bānī'
bahut dinoñ phir ghuum liyā vāpas ghar aa