na harīfāna mire sāmne aa maiñ kyā huuñ

terā hī jhoñkā huuñ ai tez havā maiñ kyā huuñ

raqs yak qatra-e-ḳhūñ aap kashish aap junūñ

ai ram-e-raushnī-e-harf-o-sadā maiñ kyā huuñ

ik bikhartī huī tartīb-e-badan ho tum bhī

raakh hote hue manzar ke sivā maiñ kyā huuñ

ek Tahnī kā yahāñ apnā muqaddar kaisā

peḌ kā peḌ hī girtā hai judā maiñ kyā huuñ

tū bhī zanjīr-ba-zanjīr baḌhā hai mirī samt

saath mere bhī rivāyat hai nayā maiñ kyā huuñ

kaun hai jis ke sabab tujh meñ mohabbat jaagī

mujh meñ kyā tujh ko nazar aayā batā maiñ kyā huuñ

abhī honā hai mujhe aur kahīñ jā ke tulūa

Dūbte mehr ke hamrāh bujhā maiñ kyā huuñ