raat kaafī lambī thī duur tak thā tanhā maiñ

ik zarā se roġhan par kitnā jaltā-bujhtā maiñ

sab nishān qadmoñ ke miT ga.e the sāhil se

kis ke vāste āḳhir Dūbtā ubhartā maiñ

merā hī badan lekin buuñd buuñd ko tarsā

dast aur sahrā par abr ban ke barsā maiñ

adh-jale se kāġhaz par jaise harf raushan hoñ

us kī koshishoñ par bhī zehn se na utrā maiñ

donoñ shakloñ meñ apne haath kuchh nahīñ aayā

kitnī baar simTā maiñ kitnī baar phailā maiñ

zindagī ke āñgan meñ dhuup hī nahīñ utrī

apne sard kamre se kitnī baar niklā maiñ

aaj tak koī kashtī is taraf nahīñ aa.ī

pāniyoñ ke ghere meñ aisā huuñ jazīra maiñ

kāTtā thā har manzar dūsre manāzir ko

koī manzar āñkhoñ meñ kis tarah se bhartā maiñ