na Therī jab koī taskīn-e-dil kī shakl yāroñ meñ
to aa nikle taḌap kar ham tumhāre be-qarāroñ meñ
kisī ke ishq meñ dard-e-jigar se dil ye kahtā hai
idhar bhī aa nikalnā ham bhī haiñ ummīdvāroñ meñ
vo mātam bazm-e-shādī hai tumhārī jis meñ shirkat ho
vo marnā zindagī hai tum jahāñ ho sogvāroñ meñ
ta.allī se ye nafrat hai ki ba.ad-e-marg ḳhaak apnī
agar uThtī bhī hai jā baiThtī hai ḳhāksāroñ meñ
hamāre dil ne ham se bevafā.ī kar ke kyā paayā
vahāñ bhī jā ke Thahrāyā gayā be-e'tibāroñ meñ
vo khīñchūñgā 'jalāl' aaheñ ki us kī ḳhaak uḌā deñgī
falak ne piis Daalā hai samajh kar ḳhāksāroñ meñ