ehsās-e-ziyāñ chain se sone nahīñ detā

ronā bhī agar chāhūñ to rone nahīñ detā

sāhil kī nigāhoñ meñ koī dard hai aisā

maujoñ ko mirī naav Dubone nahīñ detā

kyā jāniye kis baat pe dushman huā mausam

sarsabz kisī shāḳh ko hone nahīñ detā

larzāñ hai kisī ḳhauf se jo shaam kā chehra

āñkhoñ meñ koī ḳhvāb pirone nahīñ detā

ik zahr sulagtā hai rag-e-jāñ meñ jo 'fikrī'

ik pal bhī tirī yaad meñ khone nahīñ detā