zindagī jaise bhī guzregī guzar jā.egī
ye ḳhabar dekhnā ab aur kidhar jā.egī
kyā mirī zaat tirī fikr ko degī mahmez
kyā mirī baat tire dil meñ utar jā.egī
lafz badle haiñ to ma.anī bhī badalnā hoñge
varna ta.amīr kisī aur ke sar jā.egī
ruuh ik din to badan se mire hoñgī āzād
chāhtā huuñ ki na jaa.e vo magar jā.egī
ilm ke saath hai lāzim ki amal ho 'manzar'
baat sahrā kī sadā ho to kidhar jā.egī