ḳhushī milī to ye aalam thā bad-havāsī kā

ki dhyān hī na rahā ġham kī be-libāsī kā

chamak uThe haiñ jo dil ke kalas yahāñ se abhī

guzar huā hai ḳhayāloñ kī dev-dāsī kā

guzar na jā yūñhī ruḳh pher kar salām to le

hameñ to der se daavā hai rū-shanāsī kā

ḳhudā ko maan ki tujh lab ke chūmne ke sivā

koī ilaaj nahīñ aaj kī udāsī kā

gire paḌe hue pattoñ meñ shahr DhūñDtā hai

ajiib taur hai is jañgaloñ ke baasī kā