jahāñ nigār-e-sahar pairahan utārtī hai
vahīñ pe raat sitāroñ kā khel hārtī hai
shab-e-visāl tire dil ke saath lag kar bhī
mirī luTī huī duniyā tujhe pukārtī hai
shumār-e-shauq meñ uljhī huī shuā-e-nazar
hazār rūThte rañgoñ ke ruup dhārtī hai
ufuq se phūTte mahtāb kī mahak jaise
sukūn-e-bahr meñ ik lahar sī ubhārtī hai
pas-e-darīcha-e-dil yād-e-bū-e-jū-e-nashāt
na jaane kab se khaḌī kākuleñ sañvārtī hai
dar-e-umīd se ho kar nikalne lagtā huuñ
to yaas rauzan-e-zindāñ se aañkh mārtī hai
jahāñ se kuchh na mile husn-e-māzarat ke sivā
ye aarzū usī chaukhaT pe shab guzārtī hai
jo ek jism jalātī hai barq-e-abr-e-ḳhayāl
to laakh zañg-zada aa.ine nikhārtī hai