dasht-e-junūñ meñ ābla-pā le gayā mujhe
merī mohabbatoñ kā sila le gayā mujhe
vīrān is nazar ne kiyā mujh ko aur phir
tanhā.iyoñ kā dasht bahā le gayā mujhe
yaañ bhī vahī zamīn vahī āsmāñ milā
maiñ sochtā rahā ki vo kyā le gayā mujhe
ik baar bhī vo mujh se muḳhātab nahīñ huā
us ke qarīb ye hī gila le gayā mujhe
vo kyā milā na dhyān rahā bādbān kā
girdāb meñ safīna mirā le gayā mujhe
gar vo nazar-shanās nahīñ thā to kis tarah
dekhā unheñ unhī ko sunā le gayā mujhe
kashtī bhañvar meñ un kī nigāhoñ meñ bebasī
'manzar' yahī to ab ke uThā le gayā mujhe