amaañ milī na kisī ko milā qarār kabhī
koī bhī apnī zamīñ se na ho farār kabhī
baTe.ge ham bhī qabīloñ meñ ye na sochā thā
milegā ḳhauf-zada aisā regzār kabhī
jo ham-safar haiñ hamāre vo pur-ḳhulūs nahīñ
na rāhbar pe rahā ham ko e'tibār kabhī
yaqīñ na aayā ki sadiyāñ guzār diiñ jis par
us ek shāḳh ko kāTegā apnā yaar kabhī
maiñ chal diyā huuñ ai 'manzar' to is yaqīn ke saath
koī na jā.egā is tarah sū-e-dār kabhī