ka.ī rātoñ se bas ik shor sā kuchh sar meñ rahtā hai

ki vo but bhī nahīñ phir kis tarah patthar meñ rahtā hai

vahāñ sahrā bhī hai jañgal bhī dariyā bhī chaTāneñ bhī

ajab duniyā basā rakkhī hai vo jis ghar meñ rahtā hai

khilegī dhuup jab parchhā.iyāñ peḌoñ se nikleñgī

ye manzar bhī isī simTe hue manzar meñ rahtā hai

buland o past kī tafrīq kyā sab ek jaise haiñ

magar parvāz kā saudā jo bāl-o-par meñ rahtā hai

isī baa.is zamīñ kī god se uThtā nahīñ koī

bahut ārām girne TūTne ke Dar meñ rahtā hai