zamīñ pe rah ke kahāñ fikr-e-āsmāñ rakhnā

tum apne dost jo rakhnā to ham-zabāñ rakhnā

mohabbatoñ ko na.e hausle atā karnā

adāvatoñ ko tah-e-teġh ham-rahāñ rakhnā

bikhar na jaa.e mirī zindagī kā shīrāza

mire ḳhudā mirī himmat ko tū javāñ rakhnā

ye mashġhala bhī ajab hai hamāre beTe kā

har ek chiiz uThānā yahāñ vahāñ rakhnā

banānā ret ke ghar tum ko yaad to hogā

phir in gharoñ meñ mohabbat kī sīpiyāñ rakhnā