kis qadar ruuh pashemāñ hai tumheñ kyā ma.alūm

kab kahāñ kaun pareshāñ hai tumheñ kyā ma.alūm

mere afkār pe ehsās kā sahrā haavī

aur taḳhayyul meñ gulistāñ hai tumheñ kyā ma.alūm

un ke māhaul pe raqsāñ haiñ bahāreñ naġhme

merā har giit ġham-e-jāñ hai tumheñ kyā ma.alūm

raat bechain hai āñkhoñ meñ simaTne ke liye

tīrgī ziist kā unvāñ hai tumheñ kyā ma.alūm

kal jo thā sañg-e-girāñ shahr-e-vafā meñ 'manzar'

aaj vo la.al-e-badaḳhshāñ hai tumheñ kyā ma.alūm