hujūm-e-ġham se masarrat kashīd karte haiñ

ki ham to zahar se amrit kashīd karte haiñ

unhoñ ne paal rakhe haiñ zamāne-bhar ke ġham

mire lahū se jo ishrat kashīd karte haiñ

hamārī fikr abhī qaid hai zavāhir meñ

ham apne kaam se shohrat kashīd karte haiñ

sadā.eñ ham ne sunī haiñ jo shahr meñ un se

ik ek lafz baġhāvat kashīd karte haiñ

maiñ un ko dekh ke hairat meñ ġharq huuñ 'āsī'

vo mere haal se ibrat kashīd karte haiñ