use jab bhī dekhā bahut dhyān se
to palkoñ meñ ā.īne sajne lage
ḳhushā ai sar-e-shām bhīge shajar
tire zaḳhm kuchh aur gahre hue
musāfir pe ḳhud se bichhaḌne kī rut
vo jab ghar ko lauTe bahut dil dukhe
kahīñ duur sāhil pe utre dhanak
kahīñ naav par amn-bādal chale
bahut tīrgī mere mahloñ meñ thī
darīche jo khole to manzar uge
ajab aañch hai dil ke dāman talak
koī aag jaise havā meñ bahe
bahut dastakeñ thiiñ vo Thahrā bhī thā
havā tez ho jab to kyā dar khule
vo chāhā gayā thā jinheñ TuuT kar
parā.e mile the parā.e ga.e
tirā nutq hī mujh ko zanjīr thā
abhī tak na mujh se ye halqe khule