nadīm baaġh meñ josh-e-numū kī baat na kar

bahār aa to ga.ī rañg-o-bū kī baat na kar

ajiib bhūl-bhulayyāñ hai shāhrāh-e-hayat

bhaTakne vaale yahāñ justujū kī baat na kar

tabāh kar na mazāq-e-junūñ kī ḳhuddārī

dil-e-tabāh kisī tund-ḳhū kī baat na kar

ḳhud apne tarz-e-amal ko sañvār aur sañvār

mire rafīq tarīq-e-adū kī baat na kar

gurez-e-husn ko andāz-e-husn kahte haiñ

nazar se dekh magar ḳhūb-rū kī baat na kar

ye barq-e-husn jalātī to hai magar nāseh

vo aur shai hai mire sho.ala-ḳhū kī baat na kar

ye mai-kade kī fazā kah rahī hai ai 'aḳhtar'

ki tishnagī meñ bhī jām-o-subū kī baat na kar