mahshar meñ paas kyuuñ dam-e-fariyād aa gayā

rahm us ne kab kiyā thā ki ab yaad aa gayā

uljhā hai paañv yaar kā zulf-e-darāz meñ

lo aap apne daam meñ sayyād aa gayā

nākāmiyoñ meñ tum ne jo tashbīh mujh se dī

shīrīñ ko dard-e-talḳhi-e-farhād aa gayā

ham chārāgar ko yuuñ hī pahnā.eñge beḌiyāñ

qaabū meñ apne gar vo parī-zād aa gayā

dil ko qalaq hai tark-e-mohabbat ke baad bhī

ab āsmāñ ko shikva-e-bedād aa gayā

vo bad-gumāñ huā jo kahīñ sher meñ mire

zikr-e-butān-e-ḳhalḳh-o-naushād aa gayā

the be-gunāh jur.at-e-pā-bos thī zarūr

kyā karte vahm-e-ḳhajlat-e-jallād aa gayā

jo ho chukā yaqīñ ki nahīñ tāqat-e-visāl

dam meñ hamāre vo sitam-ījād aa gayā

zikr-e-sharāb-o-hūr kalām-e-ḳhudā meñ dekh

'momin' maiñ kyā kahūñ mujhe kyā yaad aa gayā