saudā thā balā-e-josh par raat
bistar par bichhā.e nashtar raat
bigḌe the yahāñ vo aan kar raat
be-taur banī thī jaan par raat
ham tā-sahar aap meñ nahīñ the
kyā jaane rahe vo kis ke ghar raat
afsāna samajh ke so ga.e vo
kaam aa.ī fuġhān-e-be-asar raat
ā.īne meñ ho na mom jaadū
sote nahīñ ab vo tā-sahar raat
taare āñkheñ jhapak rahe the
thā baam pe kaun jalva-gar raat
añdherā paḌā zamāne meñ haa.e
ne din ko hai mehr ne qamar raat
is lail-o-nahār-e-ġham ne maarā
hai roz se siyāh-tar raat
kyā pūchho ho munkar-o-nakīr aah
bigḌe jo vo tān-e-ġhair par raat
ye baat baḌhī ki mar ga.e ham
maut aa.ī thī qissa muḳhtasar raat
is ghar meñ hai aish-e-ḳhuld 'momin'
kyā jaane kahāñ hai din kidhar raat