adam meñ rahte to shaad rahte use bhī fikr-e-sitam na hotā
jo ham na hote to dil na hotā jo dil na hotā to ġham na hotā
huī ḳhajālat se nafrat afzūñ gile kiye ḳhuub āḳhirīñ dam
vo kaash ik dam Thahar ke aate ki mere lab par bhī dam na hotā
paḌā hī marnā bas ab to ham ko jo us ne ḳhat paḌh ke nāma-bar se
kahā ki gar sach ye haal hotā to daftar itnā raqam na hotā
kisī ke jalne kā dhyān aayā vagarna dūd-e-fuġhāñ se mere
agar hazāroñ sipehr bante tumhārī āñkhoñ meñ nam na hotā
jo aap dar se uThā na dete kahīñ na kartā maiñ jab.ha-sā.ī
agarche ye sarnavisht meñ thā tumhāre sar kī qasam na hotā
visāl ko ham taras rahe the jo ab huā to mazā na paayā
adū ke marne kī jab ḳhushī thī ki us ko rañj-o-alam na hotā
jahān-e-tañg o hujūm-e-vahshat ġharaz ki dam par burī banī thī
kahāñ maiñ jaatā na jī Thahartā kahīñ jo dasht-e-adam na hotā
magar raqīboñ ne sar uThāyā ki ye na hotā to be-muravvat
nazar se zāhir hayā na hotī hayā se gardan meñ ḳham na hotā
vahāñ taraqqī jamāl ko hai yahāñ mohabbat hai roz-afzūñ
sharīk-e-zebā thā bul-havas bhī jo bevafā.ī meñ kam na hotā
ġhalat ki sāne.a ko ho gavārā ḳharāsh-e-añgusht-hā-e-nāzuk
javāb-e-ḳhat kī ummīd rakhte jo qaul-e-juffil-qalam na hotā
ye be-takalluf phirā rahī hai kashish dil-e-āshiqāñ kī us ko
vagarna aisī nazākatoñ pe ḳhirām-e-nāz ik qadam na hotā
visāl to hai kahāñ mayassar magar ḳhayāl-e-visāl hī meñ
maze uḌāte havas nikaltī jo saath andāz-e-ram na hotā
huā musalmāñ maiñ aur Dar se na dars-e-vā.iz ko sun ke 'momin'
banī thī dozaḳh balā se bantī azāb-e-hijr-e-sanam na hotā