shab tum jo bazm-e-ġhair meñ āñkheñ churā ga.e

kho.e ga.e ham aise ki aġhyār pā ga.e

pūchhā kisī pe marte ho aur dam nikal gayā

ham jaan se ināñ-ba-inān sadā ga.e

phailī vo bū jo ham meñ nihāñ misl-e-ġhuncha thī

jhoñke nasīm ke ye nayā gul khilā ga.e

ai āb-e-ashk ātish-e-unsur hī dekhnā

jī hī gayā agar nafas-e-shola-zā ga.e

majlis meñ us ne paan diyā apne haath se

aġhyār sabz-baḳht the ham zahr khā ga.e

uTThā na zof se gul-e-dāġh-e-junūñ kā bojh

qārūñ kī tarah ham bhī zamīñ meñ samā ga.e

ġhairoñ se ho vo parda-nashīñ kyuuñ na be-hijāb

dam-hā-e-be-asar mire parda uThā ga.e

thī bad-gumānī ab unheñ kyā ishq-e-hūr kī

jo aa ke marte dam mujhe sūrat dikhā ga.e

tābinda o javān to baḳht-e-raqīb the

ham tīra-roz kyuuñ ġham-e-hijrāñ ko bhā ga.e

be-zār zindagānī kā jiinā muhāl thā

vo bhī hamārī laash ko Thokar lagā ga.e

vaa.iz ke zikr-e-mehr-e-qayāmat ko kyā kahūñ

aalam shab-e-visāl ke āñkhoñ meñ chhā ga.e

jis vaqt us dayār se aġhyār-e-bul-havas

bad-ḳhūiyoñ se yaar ke ho kar ḳhafā ga.e

duniyā hī se gayā maiñ jūñhī naaz se kahā

ab bhī gumān-e-bad na ga.e tere yā ga.e

ai 'momin' aap kab se hue banda-e-butāñ

baare hamāre diin meñ hazrat bhī aa ga.e