jo tum se pahle aa.e the un kī kāristānī dekho
gaañv se nikle ho to ab shahroñ kī vīrānī dekho
sote meñ marne kā mauqa.a mil jaatā hai sab logoñ ko
phir bhī zinda uTh jaate haiñ logoñ kī nādānī dekho
rokoge to phaT jā.ūñgā yaaro tum bas itnā karnā
kuchh mat kahnā mujh se jab merī āñkhoñ meñ paanī dekho
sātoñ aalam sar karne ke ba.ad ik din kī chhuTTī le kar
ghar meñ chiḌiyoñ ke gaane par bachchoñ kī hairānī dekho
itne fir.aunoñ ko māroge to kyā tum bach jāoge
mūsā-jī ye ġhussa chhoḌo aur apnī āsānī dekho