zaḳhm-e-tāza barg-e-gul meñ muntaqil hote ga.e
panja-e-saffāk meñ ḳhanjar ḳhajil hote ga.e
diid ke qābil thā un sahrā-navardoñ kā junūñ
manzileñ miltī ga.iiñ ham muzmahil hote ga.e
nuur kā rishta savād-e-jism se kaTtā gayā
ham bhī āḳhir baad o ātish āb-o-gil hote ga.e
ḳhuun meñ ūñche chanāroñ ke na hiddat aa sakī
yuuñ ba-zāhir sabz patte mushta.il hote ga.e
dil ke daftar meñ thā jazboñ kā taqarrur aarzī
haañ jo un meñ mo'tabar the mustaqil hote ga.e
jaise jaise āgahī baḌhtī ga.ī vaise 'zahīr'
zehn o dil ik dūsre se munfasil hote ga.e