haañ vo maiñ hī thā ki jis ne ḳhvāb Dhoyā sub.h tak
kaun thā vo jo mire bistar pe soyā sub.h tak
raat bhar kamre meñ maiñ dubkā rahā aur āsmāñ
merī furqat meñ mire āñgan meñ royā sub.h tak
balb raushan thā andhere ko ijāzat thī nahīñ
phir bhī vo bistar ke nīche ḳhuub soyā sub.h tak
log akḌī piiTh le kar daftaroñ se chal paḌe
mez kursī ko milā ārām goyā sub.h tak
chāñdnī shabnam havā kī barchhiyāñ chalne ko haiñ
din ga.e kyuuñ aa.e ho jaao ruko yā sub.h tak
itne chehroñ meñ mujhe hai ek chehre kī talāsh
jis ko maiñ ne kho ke paayā pā ke khoyā sub.h tak
hijr kī shab un kī aamad ke tasavvur meñ 'zahīr'
muntazir ā.ankhoñ ne dāman hī bhigoyā sub.h tak