nikāl zaat se bāhar nikāl tanhā.ī
kamāl jab hai ki sheroñ meñ Daal tanhā.ī
azāb-e-jāñ bhī jahāñ meñ nahīñ koī aisā
rafīq bhī hai baḌī be-misāl tanhā.ī
tamām zindagī do vāqi.āt meñ yuuñ hai
uruuj us kī rifāqat zavāl tanhā.ī
koī bhī vaqt ho terā hī zikr kartī hai
kabhī to pūchhe hamārā bhī haal tanhā.ī
agarche shahr meñ bikhrī hai jā-ba-jā phir bhī
'shujā.a' apne liye ghar meñ paal tanhā.ī