kaheñ ham kyā kisī se dil kī vīrānī nahīñ jaatī
hamārī zindagī bhī ham se pahchānī nahīñ jaatī
ba-zāhir aisā lagtā hai sabhī haiñ mast duniyā meñ
magar chehroñ se poshīda pareshānī nahīñ jaatī
ravā-dārī kī chādar se kahāñ tak ḳhud ko Dhāpeñge
ki is kam-zarf duniyā meñ to ye taanī nahīñ jaatī
bahut samjhā liyā dil ko bichhaḌnā to muqaddar thā
na jaane kyuuñ mire dil se pashemānī nahīñ jaatī
bahut hī lāDlā Thahrā ye maanā dil hamārā hai
magar ab is kī har ik baat to maanī nahīñ jaatī