mujhe to qatra hī honā bahut satātā hai
isī liye to samundar pe rahm aatā hai
vo is tarah bhī mirī ahmiyat ghaTātā hai
ki mujh se milne meñ sharteñ bahut lagātā hai
bichhaḌte vaqt kisī aañkh meñ jo aatā hai
tamām umr vo aañsū bahut rulātā hai
kahāñ pahuñch ga.ī duniyā use pata hī nahīñ
jo ab bhī maazī ke qisse sunā.e jaatā hai
uThā.e jaa.eñ jahāñ haath aise jalse meñ
vahī burā jo koī mas.ala uThātā hai
na koī ohda na degrē na naam kī taḳhtī
maiñ rah rahā huuñ yahāñ merā ghar batātā hai
samajh rahā ho kahīñ ḳhud ko merī kamzorī
to us se kah do mujhe bhūlnā bhī aatā hai