nahīñ ki apnā zamāna bhī to nahīñ aayā
hameñ kisī se nibhānā bhī to nahīñ aayā
jalā ke rakh liyā hāthoñ ke saath dāman tak
tumheñ charāġh bujhānā bhī to nahīñ aayā
na.e makān banā.e to fāsloñ kī tarah
hameñ ye shahr basānā bhī to nahīñ aayā
vo pūchhtā thā mirī aañkh bhīgne kā sabab
mujhe bahāna banānā bhī to nahīñ aayā
'vasīm' dekhnā muḌ muḌ ke vo usī kī taraf
kisī ko chhoḌ ke jaanā bhī to nahīñ aayā