apne saa.e ko itnā samjhāne de
mujh tak mere hisse kī dhuup aane de
ek nazar meñ ka.ī zamāne dekhe to
būḌhī āñkhoñ kī tasvīr banāne de
baabā duniyā jiit ke maiñ dikhlā dūñgā
apnī nazar se duur to mujh ko jaane de
maiñ bhī to is baaġh kā ek parinda huuñ
merī hī āvāz meñ mujh ko gaane de
phir to ye ūñchā hī hotā jā.egā
bachpan ke hāthoñ meñ chāñd aa jaane de
fasleñ pak jaa.eñ to khet se bichhḌeñgī
rotī aañkh ko pyaar kahāñ samjhāne de