thakan kā bojh badan se utārte haiñ ham

ye shaam aur kahīñ par guzārte haiñ ham

qadam zamīn pe rakkhe hameñ zamāna huā

so āsmān se ḳhud ko utārte haiñ ham

hamārī ruuh kā hissa hamāre aañsū haiñ

inheñ bhī shauq-e-azīyyat pe vārte haiñ ham

hamārī aañkh se nīndeñ uḌāne lagtā hai

jise bhī ḳhvāb samajh kar pukārte haiñ ham

ham apne jism kī poshāk ko badalte haiñ

nayā ab aur koī ruup dhārte haiñ ham