mirā siina hai mashriq āftāb-e-dāġh-e-hijrāñ kā

tulū-e-sub.h-e-mahshar chaak hai mere garebāñ kā

azal se dushmanī tā.ūs o maar aapas meñ rakhte haiñ

dil-e-pur-dāġh ko kyūñkar hai ishq us zulf-e-pechāñ kā

kisī ḳhurshīd-rū ko jazb-e-dil ne aaj khīñchā hai

ki nūr-e-sub.h-e-sādiq hai ġhubār apne bayābāñ kā

chamaknā barq kā lāzim paḌā hai abr-e-bārāñ meñ

tasavvur chāhiye rone meñ us ke rū-e-ḳhandāñ kā

diyā mere janāze ko jo kāñdhā us parī-rū ne

gumāñ hai taḳhta-e-tābūt par taḳht-e-sulaimāñ kā

kisī se dil na is vahshat-sarā meñ maiñ ne aTkāyā

na uljhā ḳhaar se dāman kabhī mere bayābāñ kā

tah-e-shamshīr-e-qātil kis qadar bashshāsh thā 'nāsiḳh'

ki aalam har dahān-e-zaḳhm par hai rū-e-ḳhandāñ kā