mirā andāza ġhalat ho to batā de mujh ko
tujh pe ilzām sivā ho to sazā de mujh ko
us ne āñkhoñ meñ jagah dī bhī to aañsū kī tarah
shāyad ik halkī sī jumbish bhī girā de mujh ko
terī nazroñ meñ mohabbat bhī hai ik khel to aa
maiñ karūñ tujh pe bharosa tū daġhā de mujh ko
maiñ ujālā huuñ to tanvīr mujhe apnī banā
aur añdherā huuñ to ai sham.a miTā de mujh ko
apnī taqdīr se Takrā.ūñ badal Dālūñ ise
itnī taufīq kabhī mere ḳhudā de mujh ko
kitnī der aur ruhāñsā mujhe rakkhegā 'ḳhayāl'
ab rulānā hai to phir saaf rulā de mujh ko