hasrato ab phir vahī taqrīb honā chāhiye
phir kisī din baiTh kar fursat se ronā chāhiye
jāgte rahiye kahāñ tak uljhanoñ ke naam par
vaqt haath aa.e to gahrī niiñd sonā chāhiye
kyā ḳhabar kab qaid-e-bām-o-dar se uktā jaa.e dil
bastiyoñ ke darmiyāñ sahrā bhī honā chāhiye
gum-rahī jin rāstoñ par mujh ko bahlātī rahī
mujh se ab vo rāste mansūb honā chāhiye
jaane kyā soche zamāna un ke ashkoñ par 'shamīm'
haañ na tum ko tanz ke nashtar chubhonā chāhiye