havas-e-vaqt kā andāza lagāyā jaa.e
raat pāgal huī darvāza lagāyā jaa.e
āshnā shahr kī āñkhoñ meñ nayā shaḳhs lagūñ
aisā chehre pe koī ġhāza lagāyā jaa.e
biite mausam meñ jo phal aa.e kasīle nikle
ab koī peḌ yahāñ taaza lagāyā jaa.e
bhāgte dauḌte shahroñ ko pinhā kar zanjīr
ḳhalvat-e-jāñ kā bhī andāza lagāyā jaa.e
maiñ bikhar jā.ūñ na kāġhaz kī tarah kamre meñ
tez tūfān hai darvāza lagāyā jaa.e