sāqiyā ye jo tujh ko ghere haiñ
in meñ kuchh riñd kuchh luTere haiñ
apnī tahzīb khā rahī hai hameñ
saañp ke muñh meñ ḳhud sapere haiñ
jis ne baḳhshe haiñ phuul gulshan ko
us ne kuchh ḳhaar bhī bikhere haiñ
kal jo tūfān thā samundar meñ
us ke ab sāhiloñ pe Dere haiñ
tere baare meñ kuchh nahīñ ma.alūm
ham agar haiñ to sirf tere haiñ
hosh-o-ġhaflat meñ paas hī maujūd
mujh ko vo har taraf se ghere haiñ
tum se to kyā nazar milā.eñge
ḳhud se bhī ham nigāh phere haiñ
dar-haqīqat vahī adū haiñ 'falak'
jin ko kahtā hai tū ki mere haiñ