palkoñ pe larazte rahe aañsū kī tarah ham
ghar meñ tire mahkā kiye ḳhushbū kī tarah ham
sūraj ke liye chhoḌā thā us ne hameñ phir bhī
rātoñ ko satāte rahe jugnū kī tarah ham
aate rahe jaate rahe kashtī ke musāfir
pairoñ se lipaTte rahe baalū kī tarah ham
rekhā hai khiñchī aur na hai siitā koī ghar meñ
is shahr meñ kyuuñ phirte haiñ sādhū kī tarah ham
ġhairoñ se zyāda hameñ apnoñ ne satāyā
is mulk meñ zinda rahe urdu kī tarah ham