vo ik vajūd zamīñ par bhī āsmāñ kī tarah
mire hudūd se bāhar hai lā-makāñ kī tarah
vo ik ḳhayāl koī bahr-e-be-karāñ jaise
mirī nazar kisī bosīda bādbāñ kī tarah
azal se sar pe khaḌī dopahar kā manzar hai
so ab ye dhuup bhī lagtī hai sā.ebāñ kī tarah
maiñ harf harf use hī sameTnā chāhūñ
magar vo phailtā jaatā hai dāstāñ kī tarah
mire badan meñ koī shai yugoñ yugoñ se 'qamar'
bikhar rahī hai kisī reg-e-rā.egāñ kī tarah