aañsū kī ek buuñd palak par jamī rahī
phir us ke ba.ad saarī fazā shabnamī rahī
tark-e-ta.alluqāt meñ us kī ḳhatā bhī thī
thoḌī bahut vafā meñ idhar bhī kamī rahī
bādal ġhamoñ ke kab se baras kar chale ga.e
āñkhoñ meñ is sabab se abhī tak namī rahī
uupar se zaḳhm-e-hijr ko to ham ne bhar diyā
andar se kaifiyat to magar mātamī rahī
yārān-e-rafta yuuñ bhī bahut tez-gām the
aur ham chale to paañv kī gardish thamī rahī