ye khet sabza shajar rahguzār sannāTā
ugā hai duur talak be-shumār sannāTā
hamāre ḳhvāb koī aur dekh letā hai
hamārī aañkh ḳhalā intizār sannāTā
vo kushta-e-rah-e-saut-o-sadā huā shāyad
vo ek lafz thā jis kā hisār sannāTā
hai lafz lafz meñ bujhte makālmoñ kā dhuāñ
sukūt-e-ishq hai yā be-qarār sannāTā
kabhī to chheḌ koī saaz koī naġhma-e-jāñ
kabhī to apne badan se utaar sannāTā