ek dhundlā sā sitārā bhī bahut hotā hai
shab-e-ġham meñ ye sahārā bhī bahut hotā hai
gardish-e-vaqt pe kyā hai mirī barbādī meñ
haath dar-parda tumhārā bhī bahut hotā hai
be-qarārān-e-mohabbat kī tasallī ke liye
un kā adnā sā ishāra bhī bahut hotā hai
kyuuñ maiñ tūfān o talātum kī panāheñ DhūñDūñ
Dūbne ko to kinārā bhī bahut hotā hai
Dūbne vaale ko dariyā-e-mohabbat meñ 'nasīm'
ek tinke kā sahārā bhī bahut hotā hai