ġhunchoñ ke tabassum par ham ġhaur nahīñ karte
ḳhāmosh takallum par ham ġhaur nahīñ karte
Duube ki rahe kashtī dariyā-e-mohabbat meñ
tūfān o talātum par ham ġhaur nahīñ karte
kaliyoñ ke tabassum kī taqlīd to karte haiñ
anjām-e-tabassum par ham ġhaur nahīñ karte
un ke ruḳh-e-tābāñ kī dekhī hai jhalak jab se
mehr o mah o anjum par ham ġhaur nahīñ karte
ġham ho ki ḳhushī donoñ yaksāñ haiñ mohabbat meñ
kuchh ashk o tabassum par ham ġhaur nahīñ karte
jab tak ki mohabbat meñ dil dil se nahīñ miltā
nazroñ ke tasādum par ham ġhaur nahīñ karte
ash.ār-navāzī hī sheva hai 'nasīm' apnā
shā.ir ke tarannum par ham ġhaur nahīñ karte