nik.hat-e-gul haiñ yā sabā haiñ ham

nahīñ ma.alūm kuchh ki kyā haiñ ham

rū-shanāsī hai ham ko ā.īna-sāñ

ek aalam se āshnā haiñ ham

ḳhāksārī se bazm-e-ālam meñ

safha-e-naqsh-e-boriyā haiñ ham

hai hamīñ se vo shāhid-e-ma.anī

harf-e-matlab ke mudda.ā haiñ ham

jām-e-mai sāqiyā shitābī de

kaun kahtā hai pārsā haiñ ham

sham.a-sāñ hai darāz rishta-e-umr

ki fanā hone se baqā haiñ ham

tere kūcha talak kī tāqat hai

nahīñ itne shikasta-pā haiñ ham

bāñg-e-sañkh aur nāla-e-nāqūs

kahe hamdam jo kam-numā haiñ ham

chashm kyā kiije vā ba-rañg-e-hubāb

turfat-ul-ain meñ havā haiñ ham

nargisī chashm thā vo kāfir aah

jis ke bīmār-o-mubtalā haiñ ham

nāznīnān-e-dahr ke har dam

kushta-e-ġhamza-o-adā haiñ ham

ai vafā tū kidhar hai ho dam-sāz

kushta-e-ḳhanjar-e-jafā haiñ ham

chashm-e-bad-dūr kyā ġhazal hai 'nasīr'

ḳhuub is fan meñ marhabā haiñ ham