sar par mire umr-bhar rahī dhuup
jis samt chalā udhar chalī dhuup
kam aisī vatan meñ bhī na thī dhuup
ġhurbat meñ balā-e-jāñ banī dhuup
maañ hai na yahāñ shajar hai koī
tā-hadd-e-nigāh dhuup hī dhuup
barsoñ se laTak rahī hai sar par
ḳhanjar kī tarah khiñchī huī dhuup
yādoñ ke nihāñ-kade meñ chamkī
titlī ke paroñ pe nāchtī dhuup
ik ruup ke naam an-ginat haiñ
bijlī barsāt chāñdnī dhuup
qaa.em raheñ tere zulf-o-āriz
saaya merā yahī yahī dhuup