ghar se ye soch ke niklā huuñ ki mar jaanā hai

ab koī raah dikhā de ki kidhar jaanā hai

jism se saath nibhāne kī mat ummīd rakho

is musāfir ko to raste meñ Thahar jaanā hai

maut lamhe kī sadā zindagī umroñ kī pukār

maiñ yahī soch ke zinda huuñ ki mar jaanā hai

nashsha aisā thā ki mai-ḳhāne ko duniyā samjhā

hosh aayā to ḳhayāl aayā ki ghar jaanā hai

mire jazbe kī baḌī qadr hai logoñ meñ magar

mere jazbe ko mire saath hī mar jaanā hai