shaam se zoroñ pe tūfāñ hai bahut
us ke lauT aane kā imkāñ hai bahut
aa.egī nūr-e-mujassam ban kar
sūrat-e-sāya gurezāñ hai bahut
kuchh bhī hoñ mauj o havā ke tevar
jism parvarda-e-tūfāñ hai bahut
shāyad aa pahuñche haiñ vo asp-savār
shahr kā shahr hirāsāñ hai bahut
jism o jaañ varta-e-zulmat hī sahī
paikar-e-harf daraḳhshāñ hai bahut
zer-e-farmāñ rahe iqlīm-e-suḳhan
rahne ko gosha-e-vīrāñ hai bahut