lagā pahchānñe maiñ rāste jab
nikālā us ne mujh ko shahr se tab
hadaf kyā thā kahāñ pahuñchā hai insāñ
sharaf ḳhilqat meñ a.alā aur ye Dhab
na rakkhī aas juz lutf-e-ilāhī
ki kaafī hai mujhe merā vo ik rab
kaheñ kuchh shaiḳh jī kyuuñ kar kaTegī
binā añgūr kī beTī ke ye shab
numāyāñ kar ga.ī haq kī haqīqat
shab-e-āshūr jo aa.ī thī ik shab
maiñ aasī huuñ magar ġhībat meñ 'shārib'
ḳhudā kā shukr hai khulte nahīñ lab